Casa Emigranti Italiani 

In Canicattinese, quello che ricordo ! Nessuna traduzione in Inglese!

Ifuoffici 

Ci su fuoffici e fuoffici. 

Ci sunu i fuoffici ca usunu i sarti, ca taghiunu a roba pi fare i causi, na vestina, o qualcosa di simili. 

Appuoi ci sunu i fuoffici ca taghiunu i pirsuni, i fuoffici ra lingua, na cosa propriu tipica re paiseddi ra Sicilia. I fimmine viecci stavunu rarrieri a porta, a rapievunu tantu pi virriri cu passava, c’avia misu, quanta e’ lunga a gonna, con cu passeggia .

I picciuotti ri oggi sti cosi ciui nun le fanu e mancu i viecciarieddi oramai fanu sti sparratini, nun taghiunu come i fuoffici usando a lingua. 

Ma ci sunu ancora pirsuni esperti ri taghiare ca lingua, pirsuni ca campunu nun pi fari ma pi sparrari: i dinosauri, pirsune ca su comu se u tiempu nun ha passatu, come nenti avessi successu  pi l’ultimi 40 anni, sti pirsuni non sulu nun anu cangiatu ma anu peggioratu! 

S’assiettunu na seddia, e sparrunu. Chiddu nun ha fattu; chiddu ha fattu ma nun l’ha fattu giustu; chiddu e cu si criri ri esseri; u mangiari e’ picca e ni custa troppu e nun sapi buonu; ma stu puostu e’ lurdu. 

E chiddi che fuoffici nun fanu mai nenti, mai na parola bona, mai na cosa da fare, e no fari mai pirchi’ masino’ puonu esseri sparrati!

i muorti vivi e i vivi muorti

ci su pirsuni ca su muorti ma nun muorunu mai!

Ni niautri, u paisi nuosciu, Salvatore Cultrera, Don Turiddu ra masciauarina, ha murutu ma e' vivu! Comu si po scurdari nu iucaturi ri palluni, nu pitturi, unu ca o scalpieddu u fici parrari e na brava pirsuna ri famiggia? Ma nun e' ca a esseri famosu, o nu scultore, o chi iautru pi siri muortu ma vivu!

e inveci ci sunu i vivi ca sunu muorti!  

Ancora mangiunu, vivunu, parrunu e sparranu ma su muorti o stissu! Vui riciti e comu si fa a canurscili? Mi pari facili: siamu chiddi ca mai aviemu na parola bona i riri; siemu chiddi ca nun sulu nun vuliemu fari nenti ma criticamu a chiddi ca ciercunu ri fari; siemu chiddi ca pi gelusia, pi ammiria, ni piace sparrari a chiddi ca fanu o ciecunu ri fari; siemu chiddi ca nun vuluemu siri ancuitati ra sti cosi nuovi, sti cosi differenti, e circamu macari di proteggere amici nuostri ra sti cosi!

" Fatti nun fuste per viver come bruti, ma per seguire virtute e canoscenza", disse Dante!

U Paisi

Nicarieddu, veramenti, ciu' viecciu, ciu' picca pirsuni! Cu ni namu iuti America, cu a Germania, cu o nord: ma tantissimi ni namu iutu!

Ma e' sempri bellu riturnarci, virriri amici, i parienti, i puosti unni amu passatu felici ri picciriddi: mancu tantu aviumu, ma cuntenti c'erumu!

Dopu qualchi giuornu io mi siddio, non ca m'incazzu, mi veni na certa noia ri fare suppergiu' a solita storia: nun sacciu comu a genti sta nu misi! Pero' a ognunu u suo, ca e' piu ca giustu! Iddi mi ricunu ca nun capisciunu pirchi' ci vaddu pi tantu picca!

Nicola Di Bari cantava ca u paisi unni nasciemu e' comu u tuou primu amuri: nun si scorda mai!

 XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Na partita ri carti

In sicilianu

Se pensati a na partita ri carti comu a viriti na televisione, quannu juocono u poker, ma chi sbagliu ranni!

Nu journu ate a veniri o club dei ianattinesi, pero’ ate a prumettere ri nun vi scantari pi tutti i vuci; ate a prumettere di nun ciamari a pulizia; ate a prumetteri ri nun ciamari i muggieri.

Allura, quattru amici, Paulu, Pippu, Nanu e Turi, s’attruovunu o club e vuonu iuacare: nun fa differenz quale iuoco e’. Scupa, trissette, briscula, , briscola a cinqu, ( iuochi a due cumpagni) oppuri u ramino stop ca si ioca sulu.

Nun fa differenza se ni iucamu nu caffe, na bibita o pi soldi!N’assittamo e cuminciamu a iucare, ma nun sulu a iucari, cuminciamu a parrari. E si parra sempri a vuci forti, ciu’ forti quannu ci sunu sbaggli.

Paulu: avanti ca su scarsi, chisti ancora su dilettanti!

Peppi ( U ma cumpagnu) : zittiti e ioca e stamu attanti e carti!

Turi: chisti assai parrunu, ma u cafe’ na ta paiari!

Nanu: e cu ci runa i sordi a sti muorti i fami!

Cuminciamu a iucari e parrari. Mentri s’avvicininu l’amici e s’assiettunu i latu!

Paulu: ciao Joe, come’ nun travaddi?

Joe: ma io sugnu arritiratu e ciu ranni i tia, tu chi fai ca!

Turi: ma chissu nun ha travaggiato mai na sa vita!

Joe: tu propria nun na parrari ca o travaggio cia’ sparatu!

Peppi: ma vi zittiti tutti rui ca a ma iucari! Ca u cafe’ ni stamu iucannu!

Nanu: ma amu vinutu ca pi iucari o parrari!

Neli: trasi no club, a vuci forte fa Buon Pomeriggio e s’assetta .

Paulu ( a peppi): ma unnu t’amparatu a iucare, ma cosa re pazzi!!!

Neli: ma chistu chi sapi iucari, i capiddi no i sapi taggiari!

Peppi ( a neli)  ma a tia cu t’ha dittu cosa, quannu iuochi tu fai comu ti piaci.

Turi: mizzica, ma a testa mi fa male cu tutti sti vuci!

Nanu: tadda dari iu un cuorpu na testa, ma comu iouchi sa carta, ma si propria rimbambitu!

Turi: ioca ca io u sacciu chi fazzu.

Peppi: avanti ca amu cunfunutu, u cafe’ ana a paiari.

Nanu: ancota neti atu vinciutu!

Paulu: ( prontu)

Peppi: ma u puosi u telefonu, sempri o telefonu e’

Paulu: iuacamu, iucamu, chistu e’ importanti, iucamu.

Turi: sempre no telefono, mannaggia a quannu i ficinu si cazzi!

Nanu: cia ma ammucciari su telefunu.

Peppi: avanti, cunta i punti a viri quantu amu fattu!

Neli: ma ca cuntari, atu persu, se nun sapiti iucari.

Peppi: ma ti vai a pierderi e cia finisci!

Nanu: a prossima vota iucamu a ma casa, racussi nun c’e nuddu!

Peppi: cacettu, e a ta muggeri cu a senti!

Santu: avanti, i soldi re carti! Chi vuliti i viviri?

Paulu: iu nenti, mi naddia iri a casa ca m’aspettienu

Peppi: io na bibita ma piddu, un aperitivo

Turi: matu fattu passari u pitittu

Nanu: nascisti senza pitittu!

Tutti: ok, ni viriemu dumani, all’una e buonu?

XXXXXXXXXXXXXXXXXXXXXXXXXXXXXXXXXXXXXXXXXXXXXXX

 XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX